नववर्षको प्रारम्भसँगै देशभर मौसम बदली, वर्षा र हिमपातको सम्भावना
वैशाख १,२०८२ । नयाँ वर्ष २०८२ को पहिलो दिन देशभर आंशिकदेखि सामान्य बदली अवस्थामा मौसम देखिएको छ। हाल देशमा पश्चिमी वायु र स्थानीय वायुले प्रभाव पारेको छ, जसका कारण कोशी, बागमती, गण्डकी तथा लुम्बिनी प्रदेशका केही स्थानहरूमा हल्का वर्षा भइरहेको मौसम पूर्वानुमान महाशाखाले जानकारी दिएको छ।
महाशाखाका अनुसार आज कोशी, मधेश, बागमती र गण्डकी प्रदेशका पहाडी भू-भागका थोरै स्थानहरूमा र अन्य क्षेत्रका एक-दुई स्थानमा मेघगर्जन तथा चट्याङसहित हल्का वर्षा हुन सक्ने सम्भावना रहेको छ। साथै, कोशी, बागमती र गण्डकी प्रदेशका उच्च पहाडी तथा हिमाली भू-भागमा हल्का हिमपातको पनि सम्भावना रहेको उल्लेख गरिएको छ।
यस प्रकारको मौसमका कारण दैनिक जनजीवन, स्वास्थ्य, कृषि, सडक तथा हवाई यातायातमा असर पर्न सक्ने भएकाले आवश्यक सतर्कता अपनाउन महाशाखाले आम नागरिकमा अनुरोध गरेको छ।
नववर्षको आरम्भमै आएको मौसम परिवर्तनले केही असुविधा निम्त्याउन सक्ने भए पनि समयमै सावधानी अपनाउँदा जोखिम न्यून गर्न सकिने महाशाखाको भनाइ छ।
