विद्यालय कर्मचारीलाई चाबी लिएर काठमाडौं आउन परिषद्को निर्देशन
वैशाख ९, २०८२ । नेपाल विद्यालय कर्मचारी परिषद्ले देशभरका विद्यालय कर्मचारीलाई आन्दोलनमा सहभागी गराउन चाबी लिएर काठमाडौं आउन निर्देशन दिएको छ।
परिषद्ले मंगलबार एक विज्ञप्ति जारी गर्दै २४ घण्टाभित्र काठमाडौंमा जारी आन्दोलनमा अनिवार्य रूपमा उपस्थित हुन अल्टिमेटम दिएको हो। परिषद्को भनाइमा अहिले पनि विद्यालय कर्मचारीहरूलाई विद्यार्थी भर्ना, नतिजा प्रकाशन र कक्षा १२ को परीक्षा सञ्चालनमा खटाइएको सूचना प्राप्त भएको छ, जसले आन्दोलनको प्रभावलाई कमजोर बनाइरहेको छ।
‘यसरी आन्दोलनलाई कमजोर पार्ने कार्य अस्वीकार्य छ,’ विज्ञप्तिमा भनिएको छ, ‘सबै कर्मचारीहरूले कार्यालयको चाबी लिएर आन्दोलनमा आउनु पर्नेछ। आन्दोलन कमजोर बनाउने गतिविधि परिषद्ले सहन सक्दैन।’
सरकारसँग विभिन्न मागहरू राख्दै विद्यालय कर्मचारीहरू गत केही समयदेखि काठमाडौंमा आन्दोलनरत छन्। उनीहरूको मुख्य माग स्थायी नियुक्ति, समान सुविधा र पदअनुसारको सेवा संरचनाको निर्माण हो।
यसअघि पनि परिषद्ले आन्दोलनको प्रभावशाली उपस्थिति सुनिश्चित गर्न विभिन्न जिल्लाका संयन्त्रहरूलाई सक्रिय हुन निर्देशन दिइसकेको थियो। चाबी लिएर राजधानी आउन भन्ने अपिलले आन्दोलन थप चर्किने संकेत देखिएको छ।
काठमाडौंको माइतीघर मण्डलामा जारी प्रदर्शनमा देशभरका विद्यालय कर्मचारीहरू सहभागी हुँदै आएका छन्। परिषद्ले आन्दोलनलाई निर्णायक बनाउने भन्दै योपटकको सहभागिता ‘अवज्ञा नभई अनिवार्य’ हुने चेतावनी दिएको छ।
सरकार पक्षले हालसम्म आन्दोलनमा रहेका कर्मचारीसँग वार्ता प्रक्रिया अघि नबढाएको भन्दै परिषद्ले असन्तुष्टि व्यक्त गर्दै आएको छ। चाबी सहितको उपस्थितिको माग आन्दोलनलाई सशक्त बनाउने रणनीति अन्तर्गत गरिएको हो।
विद्यालयहरूमा ताला लाग्ने सम्भावना बढेसँगै शिक्षण गतिविधिमा समेत असर पर्ने संकेत देखिएको छ। परिषद्ले आन्दोलनमा सहभागी नभएका कर्मचारीलाई कारबाही गर्ने चेतावनी पनि दिएको छ।
सरकार र परिषद्बीच समझदारी नजुटे आन्दोलन अझ चर्किने देखिएको छ।
