माओवादी केन्द्रद्वारा संसद् अवरोध खोल्न सत्तापक्ष र विपक्षी दलहरूसँग छलफल गर्ने
जेठ २२, २०८२ । नेकपा माओवादी केन्द्रले संसद् अवरोधको लामो अवस्थालाई तोड्न सत्तापक्ष र अन्य विपक्षी दलहरूसँग संवाद र छलफल सुरु गर्ने निर्णय गरेको छ । बिहीबार बिहान बसेको पार्टीको केन्द्रीय पदाधिकारी बैठकले प्रमुख प्रतिपक्षको जिम्मेवारी अनुरूप संसद्को गतिरोध अन्त्य गर्न पहल थाल्ने निर्णय गरेको हो ।
बैठकपछि पार्टी प्रवक्ता अग्नि सापकोटाले सञ्चारकर्मीहरूसँग कुरा गर्दै संसद् अवरोध खुलाउने दिशामा माओवादी केन्द्रले सकारात्मक पहल गर्ने बताए । उनका अनुसार संसद् सुचारु गर्न संवाद आवश्यक रहेको र त्यसका लागि सरकार पक्ष र विपक्षी दलहरूसँग छलफल गरिने छ ।
भिजिट भिसा प्रकरणमा निष्पक्ष छानबिन आवश्यक
भिजिट भिसा प्रकरणको विषयमा बोल्दै नेता सापकोटाले छानबिन अपरिहार्य रहेको स्पष्ट पारे । उनले भने, “जिम्मेवार प्रतिपक्षको हिसाबले निकास निकाल्न हाम्रो अधिकतम जोड हुनेछ। भिजिट भिसा प्रकरणमा छानबिन अनिवार्य छ ।”
उनले यो छानबिन व्यक्ति विशेष लक्षित नभएर विषय केन्द्रित रहेको बताए । “व्यक्ति विशेषमा हाम्रो ध्यान होइन तर मुख्य कुरा छानबिनकै हो,” उनले भने, “यसलाई सकारात्मक निष्कर्षमा पुर्याउनुपर्छ भनेर हिजोको सदन स्थगित भएको हो ।”
संसद् चलाउने वातावरण बनाउने प्रयास
माओवादी केन्द्रले संसद् चलाउने वातावरण बनाउन सबै पक्षसँग संवाद गरिने जनाएको छ । सापकोटाले भने, “सरकारी पक्षका पार्टी र विपक्षी पार्टीसँग कुराकानी गर्नुपर्ने हुन्छ, आजै कुराकानी हुनेछ। सदनमा छलफलको वातावरण हुनुपर्छ भन्ने निष्कर्ष निकालेको छ ।”
उनका अनुसार लोकतान्त्रिक अभ्यासमा संसद् अवरोध अन्त्य गर्दै संवादमार्फत समाधान निकाल्नु नै सबैको साझा जिम्मेवारी हो । माओवादी केन्द्रले संसद्को गरिमा कायम राख्दै जनताका मुद्दा उठाउनुपर्ने कुरामा जोड दिएको छ ।
पार्टीको जिम्मेवार भूमिका
नेकपा माओवादी केन्द्रले पछिल्लो समय प्रमुख प्रतिपक्षको हैसियतमा आफ्नो भूमिका सशक्त बनाउने प्रयास गरिरहेको छ । संसद् अवरोधको कारण आम जनताका समस्या संसदमा उठ्न नसकेको भन्दै पार्टी नेतृत्वले अब संवादमार्फत संसदलाई फेरि सञ्चालन गर्ने वातावरण बनाउने रणनीति तय गरेको हो ।
पार्टी प्रवक्ता सापकोटाले सरकारलाई समेत गम्भीर भएर यो विषय समाधान गर्न आग्रह गरे। उनले भने, “संसद् अवरोध हटाउनु सरकारको पनि जिम्मेवारी हो । हामी सबै मिलेर यसलाई टुंगोमा पुर्याउनेछौं ।”
