चलचित्र ‘‘के घर के डेरा : घर नं २’ तेस्रो सातामा प्रवेश
जेठ १६, २०८२ । नेपाली समाजको यथार्थ चित्रण गर्ने चलचित्र ‘के घर के डेरा : घर नं २’ आजबाट प्रदर्शनको तेस्रो सातामा प्रवेश गरेको छ । सशक्त विषयवस्तु र सकारात्मक वर्ड अफ माउथको कारण यो चलचित्रले निरन्तर दर्शकको मन जित्दै आएको निर्माणपक्षले दाबी गरेको छ ।
निर्देशक दीपेन्द्र के खनाल भन्छन्, “जति दर्शकले सिनेमा हेर्नुभएको छ, सबैले राम्रो प्रतिक्रिया दिइरहनुभएको छ। वर्ड अफ माउथ राम्रो भएकाले आगामी दिनमा पनि दर्शकको संख्या बढ्दै जानेमा हामी विश्वस्त छौं ।”
सामान्य नेपालीको घर–डेरा सम्बन्धी भोगाइलाई प्रस्तुत गर्ने सिनेमाले आम दर्शकको ध्यान खिचेको छ । निर्माण टिमका अनुसार दर्शकहरूले चलचित्रलाई “घरघरको कथा” भन्दै प्रशंसा गरेका छन् ।
उच्च अकुपेन्सी, शो पनि थपिँदै
चलचित्रले पाएको सकारात्मक प्रतिक्रियाका कारण विभिन्न हलहरूमा शोहरू थपिँदै गएका छन् । वितरक करण श्रेष्ठ का अनुसार केही हलहरूमा उच्च अकुपेन्सी देखिएको छ ।
साहित्यिक कथा, अनुभवी टिम
यस सिनेमाको कथा साहित्यकार बुद्धि सागरले लेखेका हुन् भने निर्देशन दीपेन्द्र के खनालले गरेका छन् । चलचित्रमा खगेन्द्र लामिछाने, निश्चल बस्नेत, आर्यन सिग्देल, केकी अधिकारी, उपासना सिंह ठकुरी, प्रकाश घिमिरे, श्रृजना नापित, संजोग रसाइली, रुविना घिमिरे, सुरज विष्ट लगायत कलाकारको अभिनय रहेको छ ।
प्राविधिक पक्ष र निर्माण
चलचित्र ‘के घर के डेरा : घर नं २’ एप्पल इन्टरटेन्मेन्ट, ए प्लस इन्टरटेन्मेन्ट र नटराज क्रिएसनको प्रस्तुतिमा निर्माण भएको हो । छायांकन कृष्णबहादुर थापाले गरेका हुन् ।
युवराज कार्की कार्यकारी निर्माता हुन् भने नकिम उद्दिन, शरद श्रेष्ठ र किरण महर्जन निर्माताको रूपमा संलग्न छन् ।
यसरी, घर–डेराको समस्या उठान गर्ने यस चलचित्रले न केवल सामाजिक सन्देश दिन सफल भएको छ, तर व्यापारिक हिसाबले पनि दर्शकको साथ पाउँदै अघि बढिरहेको छ ।
