राजसंस्था पुनःस्थापनाको माग गर्दै आजदेखि काठमाडौंमा आन्दोलन सुरु
जेठ १५, २०८२ । राजसंस्था पुनःस्थापनाको माग गर्दै संयुक्त जनआन्दोलन समितिले आजदेखि काठमाडौं केन्द्रित आन्दोलन सुरु गरेको छ । समितिले राजधानीलाई आन्दोलनको केन्द्र बनाउँदै चरणबद्ध रूपमा दबाबमूलक कार्यक्रम अगाडि बढाउने जनाएको छ ।
समितिका अनुसार वर्तमान शासन व्यवस्थाले मुलुकमा अस्थिरता, भ्रष्टाचार र विभाजनको वातावरण सिर्जना गरिरहेकाले यसको विकल्पका रूपमा राजसंस्थाको पुनर्स्थापना अपरिहार्य भएको जनाइएको छ । यसै सन्दर्भमा आज काठमाडौंको विभिन्न स्थानमा प्रदर्शनहरू भएका छन् भने सुरक्षा व्यवस्था कडा बनाइएको छ ।
संयुक्त जनआन्दोलन समितिका एकजना प्रतिनिधिले भने, ‘राजसंस्थाको पुनःस्थापनाबिना राष्ट्रिय एकता र स्थायित्व सम्भव छैन। हाम्रो आन्दोलन पूर्ण रूपमा शान्तिपूर्ण र लोकतान्त्रिक तरिकाबाट अघि बढ्नेछ ।’
आन्दोलनलाई शान्तिपूर्ण रूपमा सम्पन्न गर्न समिति र प्रशासन दुवैले आ-आफ्नो पक्षबाट सतर्कता अपनाउने बताएका छन् । आन्दोलनले राजधानीको जनजीवनमा केही असर पारेको देखिएको छ भने सार्वजनिक यातायात र बजारहरू आंशिक रूपमा प्रभावित भएका छन् ।
समितिले आगामी दिनमा चरणबद्ध आन्दोलन कार्यक्रम सार्वजनिक गर्ने तयारी गरिरहेको छ ।
