पाकिस्तानको अनुरोधपछि भारतद्वारा ‘अपरेसन सिन्दुर’ हाललाई स्थगित : मोदी
वैशाख २९, २०८२ । भारतीय प्रधानमन्त्री नरेन्द्र मोदीले पाकिस्तानको औपचारिक आग्रहपछि भारतले सैन्य अभियान ‘अपरेसन सिन्दुर’लाई हालका लागि रोक्ने निर्णय गरेको स्पष्ट पारेका छन्। सोमबार राष्ट्रका नाममा सम्बोधन गर्दै उनले पाकिस्तानका उच्च सैन्य अधिकारीमार्फत भारतसँग युद्धविरामको प्रस्ताव आएको जानकारी गराएका हुन्।
प्रधानमन्त्री मोदीका अनुसार भारतको लक्षित कारबाहीपछि पाकिस्तानले अन्तर्राष्ट्रिय समुदायसँग सहयोगको याचना गरिरहेको थियो। उनले भने, “हामीले आतंकवादका संरचना ध्वस्त पारिसकेपछि पाकिस्तानले संसारभर गुहार माग्यो। पाकिस्तानी सेनाको संरचनाभित्र लुकेका आतंकी अड्डाहरूलाई हामीले खण्डहरमा परिणत गरिसकेका थियौं।”
युद्धविरामको प्रस्ताव १० मेमा पाकिस्तानको तर्फबाट भारतीय पक्षसँग सम्पर्क गरेर आएको मोदीले बताए। सो अनुरोधमा पाकिस्तानले कुनैपनि आतंकी वा सैन्य दुस्साहस नगर्ने प्रतिबद्धता जनाएको पनि उनले उल्लेख गरे।
प्रधानमन्त्रीले भने, “हामीले उनीहरूको प्रतिबद्धता र पछिल्लो व्यवहारको विश्लेषण गर्दै ‘अपरेसन सिन्दुर’लाई तत्कालका लागि स्थगन गरेका छौं। तर म प्रष्ट भन्न चाहन्छु—यो अन्त्य होइन। पाकिस्तानको प्रत्येक गतिविधिमाथि हाम्रो कडाइका साथ निगरानी जारी रहनेछ।”
मोदीले यसलाई पूर्ण रुपमा रोकिएको नभई रणनीतिक रूपमा ‘अस्थायी विराम’ भनेका छन्। भारत पाकिस्तानसँगको तनावमा नरम रूपमा प्रस्तुत हुन खोजेको नभई, आवश्यकता परे फेरि कडा कदम चाल्न तयार रहेको सन्देश मोदीको सम्बोधनले दिएको छ।
भारतको पछिल्लो सुरक्षा रणनीतिमा पाकिस्तानमा रहेका आतंकी केन्द्रहरूमाथि प्रत्यक्ष कारबाहीलाई प्राथमिकता दिइएको छ। सीमावर्ती क्षेत्रमा आतंकवादी घुसपैठ र गोलीबारीका घटनाहरूपछि भारतले कडा प्रतिक्रिया स्वरूप अपरेसन सिन्दुर सुरु गरेको थियो।
भारतको यो कूटनीतिक र सैनिक निर्णयले क्षेत्रीय राजनीतिमा नयाँ समीकरण तयार हुने संकेत देखिएको छ। पाकिस्तानले हालका गतिविधिमा संयमता नदेखाए पुनः कडा कारबाहीको सामना गर्नु पर्ने स्पष्ट सन्देश भारतले दिएको छ।
