जेनेभामा ऐतिहासिक सम्झौतासँगै चीन–अमेरिका व्यापार युद्धको अन्त्य
वैशाख २९, २०८२ । विश्वका दुई ठूला अर्थतन्त्र अमेरिका र चीनबीच लामो समयदेखि चलिरहेको व्यापारिक तनाव अन्ततः सम्झौतामा परिणत भएको छ। स्विट्जरल्यान्डको जेनेभामा भएको दुईदिने उच्चस्तरीय वार्तापछि दुबै पक्षले आपसी सहमति जुटाउँदै व्यापार युद्ध अन्त्य गर्ने घोषणा गरेका छन्।
यस सम्झौतासँगै विगत केही वर्षदेखि जारी आयात कर वृद्धि, निर्यातमा रोक तथा प्रविधि क्षेत्रमा लगाइएको प्रतिबन्ध जस्ता मुद्दामा अब समाधानको बाटो खुलेको जनाइएको छ।
संयुक्त राष्ट्रसंघअन्तर्गतको विश्व व्यापार संगठन (WTO) को सहजीकरणमा सम्पन्न वार्तामा चीन र अमेरिकाले एकअर्कामाथि लगाइएका अतिरिक्त करहरू हटाउने निर्णय गरेका छन्। साथै, बौद्धिक सम्पत्तिको संरक्षण, प्रविधि स्थानान्तरण र मुद्रा विनिमय प्रणालीमा पारदर्शिता ल्याउने विषयमा समेत सहमति भएको स्रोतले जनाएको छ।
अमेरिकी प्रतिनिधिमण्डलले उक्त सहमतालाई ‘सन्तुलित र पारदर्शी’ भन्दै स्वागत गरेको छ भने चीनले यसलाई ‘द्विपक्षीय सम्बन्धमा नयाँ युगको सुरुवात’को रूपमा लिएको छ।
स्मरण रहोस्, सन् २०१८ देखि शुरु भएको व्यापार युद्धका कारण विश्व व्यापारमा ठूलो अनिश्चितता छाएको थियो। दुई देशबीचको तनावले विश्व बजारमा मूल्यवृद्धि, आपूर्ति शृङ्खला अवरुद्ध, लगानीमा कमी र आर्थिक अस्थिरता समेत देखिएको थियो।
विश्लेषकहरूका अनुसार जेनेभा सम्झौता केवल व्यापारिक असहमतिको समाधान मात्र नभई, दुई राष्ट्रबीचको रणनीतिक प्रतिस्पर्धामा समेत सन्तुलन कायम गर्नेसमेत प्रयास हो।
अब यो सहमति कार्यान्वयन कति प्रभावकारी हुन्छ भन्ने कुरा निकट भविष्यमै स्पष्ट हुनेछ। तथापि, जेनेभामा भएको यस सम्झौताले विश्व व्यापारमा स्थिरता ल्याउने र लगानीकर्ताहरूबीचको विश्वास पुनःस्थापित गर्ने अपेक्षा गरिएको छ।
