एक वर्षमा ८८६१ विपद् घटना, ७४५ जनाको ज्यान गयो
वैशाख १,२०८२ । पछिल्लो एक वर्षमा नेपालमा विपद्का घटनाहरू भयावह रूपमा बढेका छन्, जसमा ८ हजार ८ सय ६१ विपद्जन्य घटनाले ७ सय ४५ जनाको ज्यान लिएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका तर्फबाट सार्वजनिक तथ्यांकअनुसार, वैशाख १ गतेदेखि चैत २९ गतेसम्मको अवधिमा मात्र यो क्षति भएको हो ।
प्राधिकरणका प्रवक्ता रामबहादुर केसीका अनुसार विभिन्न घटनामा परी ६९ जना अझै बेपत्ता छन् भने १ हजार ७ सय २ जना घाइते भएका छन् । यी घटनाले १८ हजार ९ सय ९१ घरपरिवारलाई प्रत्यक्ष असर पारेका छन् भने अनुमानित ३ अर्ब १३ करोड रुपैयाँ बराबरको आर्थिक क्षति भएको छ ।
पहिरो सबैभन्दा घातक, आगलागी सबैभन्दा बढी
विपद्का घटनाहरू मध्ये मानवीय क्षतिका हिसाबले पहिरो सबैभन्दा घातक सावित भएको छ, जसमा ३५१ जनाले ज्यान गुमाए । त्यस्तै, बाढीबाट ९७, चट्याङबाट ७८, आगलागीबाट ७७, जनावर आक्रमणबाट ४३, लेक लागेर २४, हवाई दुर्घटनाबाट २३, सर्पदंशबाट १९ र भारी वर्षाबाट ८ जनाको मृत्यु भएको छ ।
अन्य कारणमा डढेलोले १०, हुरीबतासले ७, डुंगा पल्टिँदा १ र विविध अन्य कारणले ७ जनाको मृत्यु भएको जनाइएको छ । बेपत्ता हुनेहरूमा पहिरोबाट ४८, बाढीबाट १८ र हिउँ पहिरोबाट ३ जना रहेका छन् ।
आगलागी र डढेलोको संख्यामा उच्च वृद्धि
विपद् संख्याका हिसाबले सबैभन्दा धेरै घटना आगलागीका भएका छन्, जसको संख्या ४ हजार १ सय ४५ पुगेको छ । डढेलोका १ हजार १ सय ९५ घटना दोस्रो स्थानमा छन् भने पहिरोका १ हजार ५ घटना तेस्रो स्थानमा छन् ।
अन्य घटनामा बाढी ४१८, भारी वर्षा ५६८, चट्याङ ४१८, जनावर आक्रमण ४७७, लेक लाग्ने १११, हावाहुरी ३४९, सर्पदंश ८४, हिउँ पहिरो ६, भूकम्प ७४, असिनापानी १, हवाई दुर्घटना २ र अन्य ७ विपद्का घटना रहेका छन् ।
सुरक्षा र पूर्वतयारीमा जोड आवश्यक
बर्सेनि दोहोरिने यी घटनाहरूले नेपालमा विपद् व्यवस्थापन प्रणाली अझ सुदृढ पार्नुपर्ने खाँचो देखिएको छ । पूर्वतयारी, चेतना अभिवृद्धि र स्थानीय स्तरको हस्तक्षेपविना यस्ता क्षति घटाउने सम्भावना न्यून देखिन्छ । तथ्यांकले देखाउँछ—सुरक्षा संरचना बलियो नबनाएसम्म मानवीय र आर्थिक क्षति निरन्तर बढ्नेछ ।
